Dedié à ALIWMUHA ET AWRAGH
Beddiγ ad fruγ i ait ubrid atig n-uzerruy .Riγ ad sderfeγ astid kkiγ , afeγed dati sserrid ķu yan ar ittqqel. idel muhul niberdan d-uqmar n wul i umata n-id amm nek ittgannan an awḍen mas ddan.
Cigan n tusdidin ayed izrin dat an awdeγ mulley inew ad zriγ.Asiγ taγunfut , nniγ tefra seg mayedi irzem imiri , rtiγ an awdeγ ziķ dat adi issiķel yiḍ suleγ da tedduγ.Ar telliγ g iberdan , Tiķlet adi yameẓ wafa azgwaγ ,tayeḍ nejmeγ i usnbuttel nes.ur-nn uwideγ tegemmi alligi iwhel unelli.
Rmiγ ad aķzeγ aqmar n-iγerman ixataren d win wulawen n-imezdaγ nsen.Rmiγ ad afeγ mami iffulles wanecta n timaγunin itettin meķ urid ad sswunfunet afgan tten tt-innuyen.Meqqar ssalin medden s-afella, ur ufin ad kkin tasega i umhuz n tudret nsen.Uliγ tiķetrin an awdeγ ad swunfuγ , mmgarγen d-icirran irgwlen ggadinasen irebsan.Utiγ s tesga ad zriγ ad ur mnaqqareγ d ķa izaydi muhul!
Agensu , icirran ar tgannan, γas kkiγ-nn tiflut asined ibecķan. Wa ira adas ssefruγ ca g tγuri wa ira idrimen wayed ari ittettel i idaren ad ilhu.Nek ur sulaγ giγ zun id irzem ca g-urwa n unebdu. Utci ur diges seqsaγ , yuf usgwen utci.Sarseγ iγef nniγ ad sendeγ iddud yiṭtes yawyi.
Feqqeγen g iγrem , hudreγ aķ ķduγ ayaķal n tmazirt inew, ķtiγķid ayanarγi n irbi n mma. Hezzaγed tennayi twengimt inew ķa . imiq alseγ,tikelta mehdeγ afella nes, iwtid wadu n-izreg talẓaẓt d-uķennud , iggafey-as umeddaz i-imadliwen n wulinew !
Ah, tenγayi tγufi nnem a tamazirt inew , riγ aķem ḥamzeγ , aķem ssudmeγ ur ssineγ mag am zeggureγ. Tetcayi tγufi n idraren d imedwan d igḍaḍ nnem , riγ ad aggeγ ķu adγar lliγ g ķķiγ da regwleγ , beṭtu nnem yudja digi azmul d tγufi . Riγ a-tamdint ad inniyeγ iqburen immuten g unemri , ad izireγ imadliwen d luḍa nnem da rekmen s tudret n-imezzan .Ur ufiγ nek d mi isemraran awal , assa nnem ur irwas azmez lliγ .Riγ ad afraweγ s-igenna ad inniyeγ amata n tarwa nnem magen fferr.
Ggafiγ i wasif imiq snaγseγ rzeγ tamezzuγt sellas i ķan wawal , illa zun dad itffeγ islli, ssutmeγ s tesga tawuri idi yuwin s da , nniγ ad aķzeγ mayedi inna. Meķ urmeγ att asiγ , s γuri , dinna gi iwhen adas islliγ , iwet s-ifesti yagey adi irrar awal. Udjiγet g dinna g illa iggudey umeεmaε , adi iddu gwdeγ adur yad as aselliγ.
Ar sekleγ allig ufiγ attayen g-ittmra , γezeγ yat texbut ureγ adas iselliγ.Ggunniγ cigan mantur isawal, imiq iγered inna sfeled i tiwent-a :
Meqqar uri tuķized adaķ iniγ, iwa ameẓ han ķa izeglen tiķelt-a
Ara tiwent neķ , meqqar ureķ ssineγ,ad semķtiγ tidet ccili, γas iniyi
Amur nnun imimeķ iga allig ur yat tlim ? da iregwel ca digun yiγil is ur tar as lin tawuri, aqmar ittuhuz umata digun ar tiseḍrin.
Muhul ayed-id yuwin adaķ iselliγ , riγ ad swunfuγ ma amur cigan isul ilat
Matta umur tlid a bu yicķi n-imal , gwdeγ abdar nnun ur yad illi ammas n wi
Nekk ayed issen ifsan inew mag asen sentalegh.yuf uzwag is da zẓuγuren tamara !
Imaķid yuwin adi ti tattled, meķ ur γureķ yad llin icenga ?
Max mas tesned icenga isaγed kkan attayen ?
Neķ ayed igan iman n-iqburen nnun , amezruy ur as ngi mas awen ittuga imci
Hlaneķ , adu tzerrid ared-i tinid
Fafaγed, ur fukkaγ aswireg ,ur swanfaγ , ur liγ tawuri ann zeγdeγ g-umezruy ca g iγerman. Add mmuttiγ s da g illa uqmar , add dduγ s da urid iseķtayen xes icenga . asiγ aẓaẓa , saγ ssaķlen ad ur nwerwer , awdeγ ad iliγ tawuri.Han tasuta deγ ures yad id ad tili ili ? asekka hat ad meḥdeγ diγ s wass , ad armeγ iselli , is urid itrara awal