Mayyu a yennayer tgami sin

Mayyu a yennayer tgam-i sin

Mayyu a yennayer tgam-i sin
Mayyu a yennayer tgam-i sin
Mek yuweḍ yan yini ggann wis sin
Mek illa uqraf ka ur aγ-t-ssin
Igertal d iselliwen ar-aγ-brrin
Illa lehma, ngen ard xsin
Yuf-aγ a nafes tixerbicin.

Mayyu a yennayer tgam-i sin
Mek yuweḍ yan yini ggann wis sin.
Annayeγ ayenna-nneγ iga win wis sin
Wann d wann ur tlid amur keyyin
Ssenwat aksum i wayeḍ ad t-tcin
Tinim ggaε ammi tebzim

Wahli ag i-d-idda waḍu-a iĵĵan
G Mayyu 33 yuweḍ-nn urumey Ayt Yafelman
Assin ticumma-nnsen rulen zrin igran
D imendi g unrar assin iεedlan
Afella n Baddu ddaw ţţeyyara ag llan
Tirruyza ur teffiγ awd yan
Ula ttsaεiyya d buhbel g iγerdan
Tekka-d utci d waman d iεeḍban
Rmin ad rrun titi n wacal d tin ignwan!
Uγulen ad ḍaεen lqebḍan
Asen-ikan ssekkwar d ka n iεban .

Nnan ttuyat ayenna izrin
Tgim akw ammi ur djin kkin ,
Tiwuriwin ad tent-d-awin,
Inebbaḍen kan-asen tisura ad aγ-jjujin,
Ur qqimint tmannaḍin
Ula dḍeww axatar ur llin.
Akw mayed igan igellin
Iteg d tsura n tidderwin,
Ku ca mayed t-izhun ad as-t-kin ,
Tcin hḍer ammi ur djin qlullin.

Zrin iseggasen ur nanney ca,
Sulen medden g ixenducca,
Ur nn-yuwiḍ ka ixucca
Ula bḍan d uḥrir n tlexca.

Ur cin ccan γas i ayt ssinima,
D tḥellal N-inna wa tenna ta
D yan isγuyyun iγal is da ittγenna
D yat ikksen mas tdel teqqim tεerra,
Inin-as s tebγest i tnaẓurt-a
D yan igran taţţerbuct inn'ak lmuqawama,
Meεna nekwni hat nga tagwella.

Ppuf !!! ahayyaha, yuf-k uweţţuf,
A mayed iţfaren i ubrid n wi uḍuf ,
Iḥḍu tanumi n ṣṣfuf,
D uzref ad ur ittussuruf ...
Aεebbuḍ n umḍerreḥ da ittuf,
Ad yaliy meqqar ur ihuf
Meqqar ur ili tawuri ur iguf
Inn'ak key ami iga ccambrir-nnek kuf....!!!!

Mayyu a yennayer tgam-i sin
Mek yuweḍ yan yini ggann wis sin
Awi barakat is ur nessin!

Tamedyazt yaru Yassan 16/06/2007