Ika-tt-nn yan urgaz , iwet tikwemsin i tudert-nnes, γures kigan n warraw da yas-ttinin : « Nra, a bba aksum ! » Yini-yasen : « Zedmat-d th’ccem-d tesswem-d taεejliyt illan g ureh’biy ar tseksiwem adday as-d-tekka tdunt ixemmuyen nawi-tt nγers-as ! »
Aseggwas ayed ttxittin, mayed d-ittekkan ixemmuyen n tεejliyt walu. Aznen yuwen digsen s ssuq yawi-d tadunt n tgez’lin afsen-tt i wanzaren n tεejliyt γrin i bbatsen nnan-as : « Han ayenna yaγ-tennid yuwed’! »
Inna-yasen : « Iwa, allhiwat a neddu s εari dinna g ur illi awd yan, nγers-as nuzu-tt neqqim-nn ard tt-nfukku ! ur aγ-d-ittawey awd yan ach’al wala inurez awd yan ad as-nek imikezzu!! »
Qqimen ar id’ ad ur ten-yinney awd yan, ddun s yan umaγa gen diges asettur, γersen i tεejliyt, uzun-tt heyyan-as allig nn-beddan γef usenwi uten-nn han afa ur t-id-uwiyen.
Ar ttinin mayed ttegan i usud’ n wafa, imiq, inniyen-nn yan usidd iεerqen g εari. Gren ilan mayed itteddun ad d-yamez’ afa taγ-d amez’z’an g wawmaten. Iddu allig nn-igula yaf-nn hat bexxu ayd issiriden tuγmas-nnes ar ittaγ wafa. Inna-yas bexxu : « Ma k-id yuwin z’ari ay afgan? »
Inna-yas urba : «Hat uznen-i-d ayetma d bba ad asen-nn-awiγ afa ad nessnew aksum ! »
Inna-yas bexxu : « Asey-i-nn ar γurun ad awen-ssiqeγ afa s tuγmas-inu !»
Inna-yas :«Mimek ttegaγ a k-asiγ tta hat tez’z’ayed txitred ? »
Inna-yas bexxu : « Qad mz’iyeγ ard geγ amm mucc tasid-i ! ».
Yasi-t-id urba amez’z’an iddu-d s ayetmas ; kud d-ittenmili ittxitir bexxu, ar irez’z’em i yid’arren. Iddeγ t-id-annayen ayetmas ar as-ttinin : « A wa zerred’ s bexxu itca-yaγ ! », yini-yas bexxu : « Mayed ak-d-nnan? »
Inna-yas urba : « Nnan-i-d ad azzleγ g twada ! »
Allig ten-d-igula bexxu ismutter-ten g ubet’t’an n tεejliyt s mas akw llan ignu γifsen izri-ten iddu ad d-yawey arraw-nnes ad ten-tcen.
Da izerrey ka g luh’uc γren-as ttren-as ad asen-irz’em yagey allig d-idda Bamh’emd ikkes-asen tigniwin, ffγen-d tkuren abet’t’an s tferz’iz’in gnun-t allig d ammi sulen dinnaγ, rulen ddun s tgemmi-nnsen.
Imiq, han bexxu idda-d imun-d d waraw-nnes. Nitni ssaγen afa gren, abet’t’an ad inew s uyenna diges illan; ar ttd’iqqisent tferz’iz’in. Inna-yas yiwen g icicawen n bexxu : « Matta uyinn a bba ? » irar-as bexxu inna-yas : « Iγfawen-nnsen ayinn isettγen ! »
Iddeγ nnan hat nwan, ikkes-d bexxu ayenna issenwa, ibbey-as aberruy i umezwaru ; iwet iqucan-nnes g uferz’iz’, inna-yas i bba-nnes : « Γγγ, irz’ag uya, a bba! », iwet-t bba-nnes ineγ-t, yini-yas: « Nekkin, s ufus-inu, ayd ignan γifsen ar ttehd’ared !? » ; iddu-nn wiss sin yarem inna-yas awd netta : « Γγγ , irz’ag uya, a bba ! » ; iwet-t bba-nnes ineγ-t, allig ten akw inγa. Iddu-nn netta ad itc iwet iqucan-nnes g ubet’t’an, hat iga am hidj.
Inna-yas : « Ay a nek inγan arraw-inu ! Ay a nek tt-issekren i yiγef-inu ! »
Iggall ittnada wenna neγ tenna yas-igan ta.
Iqqima g yir n ubrid ; imiq, han taγat’ tedda-d ; yamm-as inna-yas : « Kemmin a mm taskiwin ayd igan aya ? »
Tenna-yas s tergagit : « Uhu, a Σemmi Zemmu ! Ad ak-ggalleγ s uyenna tez’z’ullid d mayed taz’umed mek idd nekkin ! »
Tezri-d tixsi, inna-yas : « Idd kemmin a mm igurran yalwun ayd i-igan ta ? »
Tenna-yas : « Ad ak-ggalleγ s mayed tez’z’ullid d mayed taz’umed mek idd nekkin ! »
Imiq, han alγwem ; yamm-as bexxu inna-yas : « Idd keyyin a bu ibaciren ayd igan ta ? »
Inna-yas ulγwem : « Uhu, a Σemmi Zemmu ! Ur idd nekkin ! »
Ar ammas n wass ayd d han insi ini-d tafullust ig-as algamu n us’rem kken-d icicawen d’arasen. Yamm-asen bexxu inna-yas i Bamh’emd : « Keyyin, a bu tγetrin ayd asen-irez’men ? »
Inna-yas yinsi : « Ih, nekkin ! Mayed γurek ad t-tged ? »
Inna-yas bexxu : « I mayed ak-igan γas aγz’az’ ! »
Inna-yas yinsi : « Ur t γ iyed i uγz’az’-inu, yuf-ak is i-tselmed ad ur ak-bbint tsennanin-inu aneγ ! Γas anef imi, ha-yi ad nn-nd’uγ kkeγ tit’ n ugerjum-nnek ukan tafed talwit ! »
Iγal bexxu is as-yufa yinsi tanurz’emt yanef imi ; ind’ew-as Bamh’emd s agensu n ugerd’ ittmer-as g ugerjum ar as-itteqqes. Ar isγuyyu bexxu ar ittnada mayed as-iserrin tamukrist-a diγ.
Imiq, han mucc idda-d yugel-d tajenwit g yiγir ar ittarem tawada. Inna-yas bexxu : « A wa, is tγiyed ad i-d-tekksed Bamh’emd g ugerd’ ? »
Inna-yas mucc : « Ih, taγawsa tafessast ayennaγ ! Mandi g nn-illa ? »
Inna-yas bexxu : « Ittemra-yi g ugerd’ ; mek tγiyed ad taγed settawil ard t-id-tezzrid ad d-iffeγ maca xar-ak ka iggaren iz’ri s yigenna ad ur ak-nn-aγen isufir tallin-nnek ! »
Ikjem mucc s agerd’ n bexxu yaf-nn insi ; inna-yas Bamh’emd : « Mayed ak-inna ? »
Inna-yas mucc : « Inna-yi ad ur seksiweγ s nnigi sucku llan diges isufir ! »
Inna-yas yinsi : « Imetci n bab-nnes, iwa seksew mayed illan nnigak ! kkes-d tajenwit ad tuted adun ! »
Yaγ-nn mucc, kud ittebbey tadunt iggar s yimi ; yukey ides bexxu inna-yas : « A wa ffeγ-d a mucc ! »
Inna-yas-d mucc s yimi itkaren s tdunt : « I mec ur r’iγ !? »
Yales-as : « A wa, ffeγ-d a mucc ! »
Irara-s-d mucc, inna-yas : « I mec ur r’iγ !? »
Imkinnaγ ayd as-ittini bexxu ar as-d-ittrara mucc allig as-igba s tjenwit agerd’; immet bexxu iffeγ-d yinsi d mucc, ku yan iddu iberdan-nnes.
Zriγ-tt-nn g tagat aγuleγ-d g talwat !
Ar kwen-kkateγ s ikwnennayen ar i-d-tekkatem s tutliwin.
yarut yassan 13/01/2007
Accueil 
