Ikka-tt-nn yan umeksa γures bezzaf n uctal, ar ittmun d yat teγyult isselmed-tt. Iddeγ da yas-ttarew yat taγat’ iger-as icerwan, teddu i wul-nes ard ten-inn-tesgulu axam.
Yan wass, igra-yas sin icerwan, teddu g ubrid ad ten-inn-tessiwed’ taf g ubrid uccen igen ar yalla. Tenna-yas : « Ma k-yaγen a Σemmi Σli allig da ttrud ? Yak ur illi ka n lbas? »
Inna-yas : « A ta, ayed ur tez’rid , id’arren ayed i-kkan ifexsa d ifurusen allig ur yad γiyeγ ad beddeγ ula ddiγ ! Ukan, mec tseksud g wudem n Rebbi d warraw-inew ad ten-awd’eγ asey-i-nn ar imi n usgwen-inew ! »
Tenna-yas : « Aley maka han yan sin iγejden imez’z’ann g ucwari, hat gan lamant, han ka ten-ittawd’en !
Inna-yas : « Hiy, akw ur tt-uwiyeγ g id’arren-inew dac ad am-geγ tennaγ ! » Tenna-yas : « Iwa, ney a netteddu ! »
Γas yuley Σemmi Σli ibdu ar ineqqa g iγejden imez’z’ann ; ar d-smiqqin idammen. Tannay-ten teγyult, tenna-yas : « Axes ur digsen tebdid a Σemmi Σli ? »
Inna-yas : « Γas ddu, ur ittili lbas-nnsen ! Hat ifurusen ayeddeγ i-issend’ef ucwari, ar tteddun s idammen ! »
Yufa wuccen iγejden sulen εlulmen, ukan ur teddi teγyult imih’ allig nn-gulan yad is’erman-nnes.
Ayenna ifukka yayel yaγ-nn izdar iddu irul. Yaγ lεar taγyult, taγul-d s ameksa teqqis-as kul mayed ikkan. Inna-yas : « Iwa, kemmin, γurem snat : Ad d-tawid uccen idder neγ immut neγ, mek ur tγiyed, kemmin ayed innan ad immet! »
Tedda teγyult tenna : « Yuf-i ad d-awiγ uccen ula ad i-ineγ bab-inew ! » Tuwed’-nn zik imi n usgwen n wuccen, tgen teg lbaziya ammi temmut almen-d γifes yizan zun temmut. Imih’, han Σbica, tuccent tenker-d iz’ber-tt-d ubez’z’id, tinney taγyult immuten tama n uxbu tenna : « Yuwey-aγ-d Rebbi rzeq ar tama-neγ, adj ad dduγ s aryaz ad as-t-iniγ! » Imiq, diγ, tenna : « Max ad ur as-iniγ i wuccen is wargeγ aya af ad, tayed’ tikkelt, ad i-iseksiw g wudem ? »
Tekjem ar agensu n usgwen, taf-nn Σemmi Σli isul igen, tessenker-t-id tenna-yas : « Nker, hat wargeγ is aγ-d-idda rzeq ar imi n taggurt ! Nker a wa ! »
Ffγen-nn sin han taγyult thezza id’arren s igenna terz’em i yimezran ammi temmut ; inna-yas Σemmi Σli : « Ixessa ad tt-ncekjem s agensu ad teg tinneγ γas nekwni ; dγik ad d-iddu ka yad’en yiri amur-nnes ! »
Da teh’h’uyen ard uh’len, walu ad temmecteg teγyult ; Tenna-yas tuccent : « Addu-d ad as-neg tamukrist seg uwejjim-nnek s winnes tezzuγered-tt s dat ! Nek, ard nn-tth’uzeγ seg d’art ! »
Γas yussa ugatu, tekkes teγyult ccek is is’h’a wutul, tenker tasi-tt s wassas s ameksa.
Ar ittkez’d’illi yiγef n Σemmi Σli g wakal ig xuxxu s idammen ; ar as-tettini Σbica : « A wa, t’t’ef s iwercan d izerkan ad tnejmed a Σli !
Inna-yas : « A ta, akufen iwercan, akufen izerkan, a Σbica, amm twirga xxanin ! ».
Tesgula-d teγyult uccen γur umeksa ; inna-yas : « Iwa, han tin Σli tefra ! Qad as-nekkes agwlim nger-t g uqennuc ur as-neγris ! »
Yaγ-nn umeksa allig yazu uccen ; netta igra-t g uqennuc ssiγen-as afa ad inew, iqqed-as-nn wafa g tbut’, ind’ew isiyell-d tisemdelt irul s asgwen-nnes.
Iddeγ nn-igula γur Σbica, ur t-tukiz, tenna-yas : « Mayed temsed ? »
Inna-yas : « Σli-nnem aya d-ikkan afella n yinyan, druγ inwa ! »
Tenna-yas : « Ukan ad teqqimed imkinnaγ s uh’ez’z’ud’ !? »
Inna-yas : « Uwa, ara-d mek γurem ka g yiγef-nnaγ ! »
Teddu taley s afella n yan uγulid ar teqqar i yimudaren (lih’uc) ar asen-tettini : « Anz’ad i Σli, a lih’uc ! Anz’ad i Σli, a lih’uc ! Anz’ad i Σli, a lih’uc! »
Sellan-as imudaren amz’en-d abrid s asgwen n wuccen. Tka-yas tfunast anz’ad tek-as-t tewtult ; ik-yas-t yizem ik-as-t yifis ; ar tesmuttur tuccent allig tga taffa taferqact, taγ-nn ar as-tessluγ akw ayedda tumez’ allig tedla uccen ; yaγul ig aferqac !
Dediée à mas Σumar Derouich
yarut yassan
Accueil 
