Camla nekkes askter i-tserdunet , n-ss-kjem ayenna d n-sburda , g illa kan ikecciden n tawalet ,yan uɛdil n wari d temlalet n-gmer g-imudil n yikis han areqqas n lqeḅḍan ar-aγed i-ttedza tiflut ,
Is illa hmmu ?
Hayyi mayed-i iran ?
Innak lqeḅḍan ilin γures asekka .
Addud a-Sekku ak seqsaγ , ur tessined mayed-i ira ?
Tt-ddasen tbergaget n Hha ised tekkam key d ɛaddi amerdoul tegmrmed , aya hak tsned is iga ddifandi , s umata dɣi g-d s lbarud .
Asekka , g tifawet ig uzmez ramadan , iγer-aγed urumiy an ḳjem zares , γas yanniy mumzri nes wineγ iwet s iγef innas i-umesγul nes , iniyasen id tidet umzen temlalet γersnas ? nek d ɛddi n-mtaway an-ini yan wawal , n-nnas hat nekkad Ikis , nazu tamlalet neslkmted iγrem , maka urid nekni ayed inɣan s ugari , han tiqwba nna nufa dataɣ umzenet yan ucrew n temlalet , ganet tin Hha , nekni nγal id tin ka g irehhalen , iddeɣ issen id nekwni ayed tt-yussin isnid iγef zarek adaket yini tta hat ur neskir yat . innas i-umexzniy nes awiten s-akurmu ,kes asen tiqwba , tt-ged-asen sin iyyar , n-ffγed awinaγ s-yat thanut iqmren tellas g daret lqecla n umellagu .
Azmez iga remdan , lehma iga zun tikmired s af̣a . iwa tinγ aya , nniγas i-ɛaddi . tedeggwat s tdeggat meɛna daγ rzmen ared nagem aman g taγbalut i-urumey d imxezniyen , ukan ar n-tt-arem mimek ntegga anebdu d twuriwin kaned iγef . awed bḅa illa g ukurmu zuned nek , innaγ xef waman netta d yan imeswi n lqayed grinet awed netta g tebniqet .
Yat tdeggwat , ayenna ddiγ ad agmeγ aman , mnaqqareγ d yan u-iγrem aznγet , nniγas ssiwden awal i-muha nneγ , iniyas hat nella akw g ukurmu dγi add iddu han tigemmi da tṣuḍ teqqim twuri walu mayed-tt igan .
Asekka han muha neγ igulad , netta igan amxzniy γur irumin g warfud . yaliy s Asul s-lqayed uskenti , innas hat granaγ tinna ur-ngi dγi ayenna igan ait ɛisa yzem nek hat llan akw tt-ukrfen g ukurmu . iddu lqaid s lqmanḍar n irumin itter as ad iγer i lqeḅḍan ad-as yini ad irzem γas i yan beɛda ad ur qqimen akw s-sin . ayennaγ ayed ikkan , ur-d yuwiḍ muha neγ iγrem allig-d yufa bḅa g tgemmi .
Id nek d ɛddi , hat γas an ẓzider ad izrey uzmez usafi .
Ara-kid a yan umxezniy n urumey seg Uzru iga ameddakel inew , da γureγ itγima id gg̣iḍ ar ased ttawin wineγ , tiglay , aneddu d mayed igen ca d ucetci . yan was innayi is tsnem Hha deγ awenet isγan , iwa hat ad-awen aset sqeγ add ikjem s γurrun , mdden da teggan mulley i-uγrum d lahlib d teglay , ku as yan iγeṣ g yan iγrem add yawiy s lqecla . allig iga mulley win iγrem nneγ d win iγess n Hha , yawid yan snat talqerɛtin n lahlib iḳastnet i-umxezniy iddu , yasid umeggaru-a aiskectu amata g uyenna illan g leqraɛi , i-mreḍtnet s waman allig ican ca awed tamelli nesenet !
Isney iγef s-arumey innayas han , Hha mayed iga hat yuwid lahlib itḳaren s waman hat ira ad-i ineγ tarbat , netta tella γures yat tselmya mi yakka lahlib n lqerɛa ide as walu win ṃma nes.
Asekka han Hha , granet-id ẓareγ ad izrey amur nes , uḳan nekni nella nmaṭel g udγar nestiy tiγmret ihlan , nagey att nadej ad iggan tamaneγ , iter-as i umxezniy att yawiy s kan ansa yaḍen ur issin id att yajey i lkuri ij̣jan g-illa iyyis .
Ur imatel uzmez , yan was han amxezniy iγrayid , innayi han bḅa iddad seg uzru ad γuri ikk , hat yuweḍ Rrich , hat walu mayet-id isgalan , dγi hat innaḳ urumey awey iyyis teddud hat attin tafed g lqehwa n Muci . nniγas hat uhleγ , hat mayed ila wass tt-agmeγ dγi mek tufid azen ḳa yaḍen . innayi ur i-tteddu γas ḳey , mḳid ɛaddi hat iga ahizun , id ḳa ḍen hat uri isɛrim att azneγ , ddu adday-d taγuled hat adas afeγ anurzem i-tmurkiset nek , ad seḳsuγ mimek tteggaγ ad tennarzmed .
Tafuyet tuder s-aγelluy , laz d fad n ramdan llan digi , rezmeγ i-iyyis , nhemeγ-as g iγef aman ar ixbeḍ acal , ur iɛttir alligen uwdeγ agweddim . tin wutci sawlenti camla zriγ ait mxun ḳa ur ta i-ikki γas kan waman nniγ adej ad ddzeγ i Heddu , qqan afeγ meqqa-d γas ḳan tebɛucin .
Ayenna nn-kejmeγ , afγen han amata illa , han tiyni , han awed ahrir iqqima g uruku . iwa aqq-γen allig tciγ , uteγ yan sin id cqef , suγ aman nniγas i Heddu iwa a ddiγ an awḍeγ Rrich , hat da-i i-tganna Bba n umxezniy hat sṣ-aweḍen-as awal s ifilu ad ur ɛeṭreγ ukan izɛef .
Awa aweḍ ad teqqimed , id akurmu ayed igan ameggaru hak tellid diges , iwa mayed yad nn-iqqen ugar nes ? nniγas uhu , nurzeγ is ur-i irzẓem lqebḍan , hat innayi umxezniy ad-aset itter .
Camla ar tnaqeγ d iburksen inew atten qneγ han mayed i-tt-dzan tiflut n Heddu , yanef hat areyaz nnas ddiγ att-id awiγ , imuned d kan inejda ar agweddim , nnan as iwa swunfu γur bu tgemmi-ya hat ur da irggel tiflut nes xef awed yan .
Nmseqsa allig d nusa , isineγ id netta ayed ugan tawuri sed ddiγ , nniγas iwa adday tetcid ka , tawid-n han iyyis nek hayyi ddiγ ann lḳmey tifawet iγrem . nek muhul iga digi ayenna tin iqqen , maka nurzeγ is-ur nn ssikileγ meqqar-dd ar agwejjim n yiḍ kan tdewwaret n-uzgen n ramadan , nnani tella g tgemmi .
Amzeγ-tt-d tiklet tarula , tklet tawada i-sdrfen, ur-d uwiḍeγ iγrem ar amata n uwdden n wuzum , llan ḳan lasfad g tmendilet udjanten meqqar ur dmin add uγuleγ , yili kan uγu iḳrmen asiγed allig isen zriγ yan uqecbu n uγrum . tifawet dat ad taliy tafuyet dduγ s lqecla awiγ as i-umxezniy yan udar n uḳsum n tmeγruset . allig-d inker urumey , izeryi ẓares , inna-as han ayelliγ aḳ nnan γef ugmar , hat iga tidet , tiqwba hat ganet tin Hha , hat i-tter digi asnat ad as-tt-net rareγ agiγ , hat iqerra id tines ayed ganet .
Irzem aγ neddu g winneγ , Hha netta ssufan-as s 4 n-iyyar yaḍnin n ukurmu , ad yisin mimek itegga usekka n-unna isṣiwiḍen awal d tbergagin n lhis .
Accueil 
