Mayed aked iqqiman ayamazigh!

Ig riγ ad uruγ ḳa γif tmaggit neγ imaziγen , dan ttafaγ awal riγ ad iniγ hat i-ttuna yad urid γas yat tiklet . mayed ur nnin imaziγen g isegwasen izrin ? g tfifγin asen yunfen ifasen , g isemlan sḳren s tigidet nsen , g idlisen d i-ssafγen ? amata ittuna , amata iwḥel ittini is aγ ittuga ukarif afella n waḳal mi ur nessin tamazirt abla netta .
Unna isawlen ad yini arah , meḳ uri-tyawiy s-aḳurmu , ininas key tgid aqeryan amgun , ḳey ayed iran ad isfafa iniγan t-fezeɛed temmurt igan yat i-ttidiren g wazzul , tamunet d taymat ! ḳey ur-aḳ igi γas igel is trid add t-selḳmed imɛidan ar tawja neγ !!
Mayed aḳed iqqiman ayamziγ ? iḳabaren yad illan hat iḍaren d tfekka nsen itettan llan γureγ id anelli asen iswingimen hat illan g unqer , γur ait filistin d lɛiraq . trid ad tged winek , g yuwet tiklet taγed lmakịna n thellal n lmaxzen afella nek ar-d agren winna k i-rgmen winna ḳ-itfaren !
Unna yurmen ad ig ḳa igan amaynu ur yaγen g umata n-imexxaren yumzen tawryit n-uzmez-a , aγenen γifes ismunen nes d ineγmasen ur i-ttafan mag gmren am urekkiẓ-a ! dat ad iddu udabu iṭfed aγriy s ufus aḳeffas d imih n iqariḍen s-uzelmaḍ yini yaḳ stiy !!
Mayed aḳed iqqiman ayamaziγ γas aḳ ssitmen s ḳa g-izaγaren iqquren ur ittarwen anebdu ula tamamet uten aḳen aqiḍun gin-aḳ imran inin-aḳ han ḳa tten izerrin , mayed ur tammud g usiwey n-tγawsiwin n tmaziret nek , mayed ur yammu wawal neḳ igan aqbur g yilsawen isul iddren g tseggin n wadday n yilel umlil iwa qqim da niy ḍaret i-tudret dγi aḳid yaweḍ muley temḍled teddud !!
Mayed aḳed iqqiman ayamaziγ γas agadir-a seḳ tt-ḥuzen att talid meqqar aḳ iga asawen , aliy s-adrar ayamaziγ urid an teqqimed ad tidired diges maḳa add tawid assas s luḍa .