yassan
Imherri
Messages : 536
Date d'inscription : 02/08/2007
Localisation : Adrar
 | Sujet: Asikel g umezruy :1  Ven 11 Sep 2009, 11:59 | |
| 
Nekreγ-d zik ass-nnaγ n 11 Cutanbir 1980 dat ad issadd wass. Lliγ zhiγ ammi riγ ad dduγ s ka n tmeγra tta akuker d tuwda munen d twengimt-inew. Assa, ad dduγ s Tizi n Yimnayen (Gwelmima) ad γfureγ taγuri-new ḍart mayed uliγ zriγ tin iγrem. Nekreγ-d g unuddem sniγ iγef ad smuttreγ iɛbanen-inew g yat tissufra, mma tella ar tteḥtal i imekli.
Kud ittetta bba imecli-nnes i-ikkat ad tceγ ka , nek mayed igan utci ur iri ad i-ileqqwem. Inna-yi bba: « Ttec ka a memmi, hat ad teddahdad ar ttrarad g ubrid! ». Ar ttafseγ aγrum allig ur iri asiγ iγef i yan uḍangaz n watag allig t-swiγ aqeγ-nn ir n ubrid ar ttgannaγ Σessu Uγmad.
Iddeγ sellaγ i udida iggufi-d , γerγ-as i bba s afella nniγ-as ad d-iggwez han amekkalu igula-d.
Iger-as bba afus i Σessu Uγmad yamm naley s afella nemḥemmaz d cigan n medden maca awed actal iddan ad inez g ugdez illa ar id-s nettemḥuz idγaren.
Iggufey umeḥray i ubrid s imiḥ iddeγ illa iga γas iselliwen d taqqatin ur iḥlin. Ur d-iwrerriy g Ayt Sliman allig d-tut tafuyt g Buyeflilu.
Γas nezrey imadliwen n Tirsal iddeγ yufa umeḥray ad yammer i trula nakey d uṣemmiḍ irura iḍarren-nneγ d zuned tactatin tiqurarin. Maka meqqar, lliγ ar ttgannaγ mantur nn-nettaweḍ Γris yuwin taγḍeft-inew akw mayed tla taγzi n ubrid.
Nekka γif Tdiγust , llan imezwura g winna d-ittaγulen g yigran ka yusi-d isγaren γef iγwerdan , ka iḥeccad ka n ineqqiben idd amata illa ar ittnaγ d tiyni g inurir neγ d g yigran.
Tikkelt tamezwarut ttinniyeγ s taseddi azaγar n Tzuγmit. Tuwey tiṭ-inew taγzi d tirut n luḍa ur id amm tmazirt-inew iqemren mi ttin idurar. Ayenna yad kkiγ abrid-a, tikkelt tamezwarut lliγ yaγ-i ka yawey-i bba s asaglaz n Imteγren semmus n iseggwasen dat uya , ur γiyeγ mayed sniγiseγ , idd ayenna d-aγuleγ niγ-d nek d bba γur Σessu Uγmad nemgar-d d tredla n Ḥmadi g inγa igellin n iymas Hru, ur tt-uwiyeγ g usniγes n yigran d win iγerman.
Ayenna nn-ngula asif n Taltefrawt, Igran n Magaman igan aha izegzawen d tekwut mi gan wafriwen iɛlalamen , behḍeγ iddeγ anniγ aman sulen. Nek iγalen iddeγ ddan ad bbin g treggwin-nneγ g yijyal is ur nnin ad ilin waman γur Ayt γris.
Asaglaz =hôpital
Aḍangaz : verre ( lkis)
Amekkalu : camion ( lkameyyu)
| |
|
Accueil