Messages : 536 Date d'inscription : 02/08/2007 Localisation : Adrar
Sujet: Asikel g umezruy :3 Sam 19 Sep 2009, 06:49
Neffeγ γur Sidi Σli neddu s tama n tagant tamezzant illan nil Bba Qeddur neqqim a neswunfu. Han unna iqqiman ibedda seg mayed d-yuley wass ard teḥmu , ur idd γas iγimi ayed t-isswunfun. Llan akw itsen ayt yijyal ittγiman uten-tt s yiṭes ddaw ka n useklu neγ tama n ka n ugadir. Qqiman irizen id bba-nneγ ad swunfun g umalu n isekwla neddu nekkin d yitsen icirran Ayt Umellagu a nessara. Ar nettgafay ar netturruḥ i leεlawi n Tizi n Yimnayen (Gwelmima) allig nuḥel. Sgwalan-aγ-nn iḍarren-nneγ ar tama n yitsen iferxan g tella tiyni tenwa.Tikkelt tamezwarut g ttinniyeγ taεenwuṭ n tiyni tsul afella n ufrux tt-yurun. Llan icirran n iγerman imazdaren n Γris amm Ayt Mucc , Igwelmimen d Izerraren da d-tteddun s uḍar neɣ s iẓakaren ad kelsen iγfawen-nnsen g tγuri. Llan umman itsen ar kkaten ad d-tḍer tiyni g yat tefruxt illan tga tustiyt g yir n ubrid. Nudja-ten allig ddan naγ-nn ar nettlaqqaḍ tinna zrin ur tent-usiyen. Netkar urawen-nneγ s yan rheḍ n ṣayer ar netteddu g yigran allig neggwed ad ẓareγ tteqqlen imarawen-nneγ. Nra ad d-nuγul i ubrid nekka maka nezla ar netteddu allig nn-neffeγ g ubrid n Tilwin! Nekwni d-yuwḍen ansa g nezrey id bba-nneγ hat walu-ten. Seqsaγ itsen icirran Ayt Usul γef winew nnan-i hat idda imun d ka n irizen ad d-kken γur ka n yuwen da illeγ tiḥuna i icirran ayt tγuri. Ur nn-imaṭel cigan hat yaγul-d inna-yi : « Hat aγuleγ seksuγ-ak ad tzedγed d yitsen icirran ayt tmazirt, llan umẓen yad yat tḥanut γur Ḥda seg nḍaḍand. Imun idi sγursen. Nek ur i-ibriy mag illa udγar neγ is iriw, izeddig neγ inmala, nurzeγ ad iliγ d ka yi-yugren yili innum yad da. Ad γifi irar tayet ar i-isikki abrid ig ur ukizeγ ka g tγuri. Tella tḥanut-a g yan leɛlu n tgwemma n waluḍ zund tin iγrem-inew. Meqqar illa umata n yizeγ amaynu n tgwemma s ssima d wuzzal, tinna ttellγen icirran ayt tγuri gant γas tiqburin mi ttekkefruruyen igudar s umariγ.
Accueil 
