Nezrey , bba d nekkin iḍ amezwaru ɣur memmis n wannatma (ɛemmi) n mma illan izdeɣ g Tizi n Imnayen. Netta iga yan unelmad isseɣran g tesnawit (college) tamaynut innan ad isfal aseggwas-a. Itter-as bba ad ig amazan-inew irar ẓari taɣḍeft ad ur i-innegzu ka.
Tifawt n usekka, nedda nekkin d bba s ɣur Sidi Ḥmad, bu lehri allig iqḍa tamsuɣt-nnes ittazen s iɣrem, tella tḥanut ɣur bba g tmazirt d ku sin ar kraḍ imalasen da d-itteddu ad iqḍu amata n tɣawsiwin as-ssuturen medden. Ḍart mayed ismatter amata n uyenna isɣa issali-t Ijɛa, yan uzerzay-nnes, s afella n umekkalu n Ɛessu Uḥmad mi itter ad t-inn-isgulu ar iɣrem. nberrem-d diɣ s asasu (café) n Sidi Ɛli g llan cigan n ayt yijyal da ttmujen. Han irizen d-imunen d icirran-nnsen s tɣuri, han wiyeḍ d-imunen d tcirratin-nnsen ad sɣent iɛbanen n tmeɣra neɣ ad nnareẓment neɣ ad msasant d irizen-nnsent. Illa imi n Sidi Ɛli iga zund agdez adday iḥma wass ku yan d mas yuwey iɣef.
Neswa diɣ atag neddu ad i-iseɣ bba ka n iɛbanen, alugen (cahiers) d idlisen.Lliɣ fejjejeɣ cigan iddeɣ d tikkelt tamezwarut ad i-iseɣ ibureksen n ubetṭan. Usiɣ-ten qqimeɣ ar digsen seksiweɣ gan ungalen isfikkiten. Nniɣ wi ad ten-llaseɣ ass amezwaru kkseɣ-ten ffreɣ-ten ard iriɣ ad dduɣ s iɣrem. Isɣa-yi awd yat talkebbuṭ tazurart iḥlan g ggudint trufa (poches), yan userwal amelday n trula d waddal (sport), tarɣiwin d yat tqidurt n taḍut taɣwezzaft i uqraf.
Iddeɣ nfukka, meqqar nessen is yad llan imeddukkal-inew zedɣen nitni seg nḍaḍand da, inna-yi: "Nker a neddu dɣi s tḥanut-nnun, a nsigger akw ur innegzi ka g ifeckan n unwal!
Accueil 
